A Xunta tentará favorecer as inversións galegas en latinoamérica

O secretario xeral de Emigración reuniuse en Caracas con representantes das empresas galegas en Venezuela.
-

O secretario xeral de Emigración, Manuel Luís Rodríguez, mantivo unha reunión de traballo, aproveitando a súa estancia en Caracas con representantes da Asociación de Empresarios Galegos en Venezuela, a fin de acordar a colaboración entre o Goberno galego e esta rede de empresarios para favorecer espazos e oportunidades de inversión na sociedade venezolana. Neste senso, coincidiron na conveniencia de procurar iniciativas que permitan compartir intereses, métodos de traballo, ou instrumentos que favorezan a colaboración intersocietaria entre Galicia e Venezuela, como a sinatura de convenios, o establecemento de protocolos de actuación, ou coordinación efectiva e regulada coa administración autonómica. Os representantes da Asociación de Empresarios Galegos en Venezuela anunciáronlle ao secretario xeral a súa disposición a viaxar nun prazo breve a Galicia para facer unha posta en común dos intereses comerciais do tecido empresarial galego no exterior, facendo fincapé non sectores agropecuarios e das novas tecnoloxías, especialmente significativos en Venezuela. O secretario xeral de Emigración subliñou a importancia de tecer e poñer en funcionamento unha rede de empresarios galegos no exterior para que estes se interrelacionen entre si, dando cobertura e facilitando os intercambios comerciais, negocios e investimentos. Para o seu funcionamento, sinalou, é esencial que se establezan dinamizadores da rede en cada país, e nese senso destacou que a opción máis interesante e proveitosa é que sexan as propias asociacións de empresarios participantes na rede as que exerzan a dinamización da mesma. Rodríguez comprometeu a colaboración da Xunta de Galicia, e no que toca ao departamento que el dirixe, recordou que xa está creada a Plataforma virtual GAER (Galicia en Rede), concibida como directorio de información e instrumento de comunicación, que prestará soporte aos galegos proporcionando servizos nunha grande variedade de campos e sumará ao ámbito empresarial outros de grande interese para a comunidade galega emigrante como o cultural, o social, o institucional, o tecnolóxico e o medioambiental.A viaxe de Manuel Luís Rodríguez por Cuba e Venezuela continuará durante esta semana, na que terá oportunidade de entrevistarse co Gobernador de Aragua, Didalco Antonio Bolívar, para avaliar a situación da seguridade dos galegos no Estado de Maracai, así como de reunirse coa comunidade galega en Caracas, Valencia e Maracai.

-

XORNAL.com-Santiago-España/Opinión /11/07/2007